Javnaðarflokkurin og Sambandsflokkurin varðveita fólkatingssessirnar

Ein nýggj veljarakanning, sum Spyr.fo hevur gjørt fyri Blaðið Vikuskifti hjá Portalinum, vísir, at Sambandsflokkurin og Javnaðarflokkurin varðveita sessir sínar í danska fólkatinginum.

Í kanningini hevur Sambandsflokkurin stóra afturgongd og Javnaðarflokkurin stóra framgongd, men hesir báðir flokkarnir vinna tó sannførandi á hinum báðum stóru í kappingini um fólkatingsessirnar.

Javnaðarflokkurin stendur til at fáa 31,5 prosent av atkvøðunum og Sambandsflokkurin 23,7 prosent, meðan Tjóðveldi og Fólkaflokkurin eru væl aftanfyri við ávikavist 18,6 og 16,5 prosentum.

Enn eru tó nakrir veljarar eftir at kappast um, tí kanningin vísir, at níggju prosent av veljarunum ikki hava tikið støðu til, hvør skal fáa atkvøðuna.