Ríðing: Svanna vann á Braga

Svanna vann á Braga í tvíspori fyri vaksin, tá FM-dagur var í Marknagili um vikuskiftið.

Rossini høvdu vunnið hvør sínar tvær kappingar undan FM-degnum, men Svanna við Barbaru Carlsen á baki var eitt vet skjótari á breytini hjá Føroya Ríðingarfelag í Marknagili leygardagin.

Svanna og Bragi við Jónu Ólavsdóttir fylgdust allar 500 metrarnar, og á málinum var munurin millum rossini bara fýra hundraðpartar av einum sekundi.

Tað er 15. ferðin, at ross hjá Maritu Askham og Hans Paula Poulsen vinnur FM í tvíspor fyri vaksin.

Kappingina í tvíspor fyri ung vann Sirkill við Ranju Djurhuus, Tango við Geir Wardum vann tølt, meðan Strákur og Bárður Johannessen fóru avstað við FM-heitinum. Stígur og Randarsól Heinesen vunnu kappingina í Skeið, men Orka og Ranja Djurhuus vunnu FM. Trav vann Grettir við Halli Hansen, sum eisini vunnu FM-heitið.