Polar Seafood selt síni partabrøv í russiskum dótturfelag

Grønlendska felagið Polar Seafood hevur selt síni partabrøv í russiska dótturfelagnum. 

Líka síðani Russland tók seg inn í Ukraina í februar, hevur felagið roynt at selt sín part í russiska dótturfelagnum, skrivar grønlendska blaðið Sermitsiaq.

Partabrøvini eru seld russiska samstarvsfelaganum og stjóranum í dótturfelagnum, Konstantin Kuznetsov-Serbskij.

Polar Seafood

Avtalan var undirskrivað í august, og nú er sølan endaliga avgreidd, sigur Henrik Leth, nevndarformaður í Polar Seafood.

Konstanin Kuznetsov-Serbskij átti frammanundan 25 prosent av partabrøvunum.

Polar Seafood hevur hjálpt stjóranum at keypa partabrøvini við at veita honum lán. 

- Vit eru ikki ótrygg um hetta, tí vit hava arbeitt saman við honum í nógv ár og hava fult álit á honum, sigur Henrik Leth, nevndarformaður, við Sermitsiaq.