KÍ endurvann FM

Tað var FM-rómur í Klaksvík í gjárkvøldið, tá tað gjørdist endaliga greitt, at KÍ er føroyameistari í 2022. 

Tað hendi eftir, at HB í gjárkvøldið vann 2-1 á Víkingi. Víkingur var einasta felagið, sum hevði ein matematiskan møguleika at enda framman fyri KÍ á stigatalvuni, tá ið fimm umfør vóru eftir at spæla. Men tað kravdi, at Víkingur vann allar sínar dystir, meðan klaksvíkingar taptu sínar. 

Men við 21 sigrum og 2 javnleikum higartil í ár hevur tað bara verið ein spurningur um tíð, áðrenn KÍ endurvann meistaraheitið. 

Hetta er fyrstu ferð síðan 1970, at KÍ endurvinnur FM, og er talan um 20. meistaraheitið hjá felagnum.