Átta fólk tikin fyri at hava sprongt Krim-brúnna

Átta fólk eru handtikin eftir spreingingina á brúnni millum Russland og Krim-hálvoynna.

Tað skrivar almenna russiska tíðindastovan Interfax, sum endurgevur eitt talsfólk hjá russisku fregnartænastuni.

- Í løtuni eru fimm russiskir ríkisborgarar og tríggir úr Ukraina og Armenia, sum vóru uppi í brotsgerðini, handtiknir í málinum, skrivar Interfax.

Sambært russisku tíðindastovuni TASS, sigur FSB, at stjórin í fregnartænastuni hjá ukrainsku verjuni, Kirill Budanov, starvsfólk hjá honum og loyniumboð skipaðu fyri bumbuatsóknini.

Upplýsingarnar eru ikki váttaðar.

Kerch-brúgvin, brúgv til Krim-hálvoynna, Krim

(Mynd: Ritzau Scanpix)

12 fólk eyðmerkt

TASS skrivar, at FSB hevur eyðmerkt 12 fólk, sum skulu hava skipað fyri atsóknini.

Samskiftisdeildin hjá russisku fregnartænastuni skrivar, sambært TASS, at tey halda seg vita, hvat hendi, tá ið brúgvin millum hertiknu Krim-hálvoynna og Russland varð sprongd leygardagin.

Hon heldur, at bumban var krógvað í byggitilfari, og var send úr Odesa gjøgnum Bulgaria, Georgia og Armenia. 

- Bumban var fjald millum 22 pallar við byggitilfari, og var tíðliga í august send úr havnini í Odesa til býin Ruse í Bulgaria, stendur í fráboðan frá russisku fregnartænastuni FSB, og sum russiska tíðindastovan TASS endurgevur.