Løgmaður: Ikki neyðugt at spyrja Uttanlandsnevndina

Løgmaður gevur Jenisi av Rana, landsstýrismanni, rætt í, at ikki var neyðugt at spyrja Uttanlandsnevndina hjá løgtinginum fyrst, áðrenn hann legði arktisku strategiina hjá Føroyum fram á fundi í Reykjavík.

Tað sama er at siga um rammuavtaluna við Ísland um fiskivinnusamstarv, sum Jenis av Rana undirskrivaði herfyri.

Høgni Hoydal, løgtingsmaður, spurdi løgmann um hetta.

Jenis av Rana, Miðflokkurin

Jenis av Rana, landsstýrismaður í uttanríkismálum. (Mynd: Bjarni Árting Rubeksen)

Ikki bindandi

Løgmaður svarar, at hann spurdi Uttanríkis- og Mentamálaráðið.

Haðani fekk hann svarið, at tilgongdin at orða arktiska politikkin byrjaði á vári 2020, tá eitt samt landsstýri og ein samd Uttanlandsnevnd tóku undir við ætlanini.  

Arktiski politikkurin, sum var lagdur fram í Reykjavík, er ikki bindandi fyri Føroyar. Ikki var neyðugt at fara í Uttanlandsnevndina við málinum.

Ætlanin er at hava aðalorðaskifti í løgtinginum um arktiska  politikkin.  

Um rammuavtaluna við Ísland um fiskivinnu sigur løgmaður, Bárður á Steig Nielsen, sum eisini her spurdi Uttanríkis- og Mentamálaráðið, at avgjørt var í 2017 at fara undir samráðingar við Ísland.

Nøkur samráðingarumfør hava verið.  

Høgni Hoydal

Høgni Hoydal, løgtingsmaður, spurdi løgmann.

Løgtingið skal góðkenna

Karmsáttmálin var undirritaður í Reykjavík 14.oktober. Hann kemur í gildi, tá Føroyar og Ísland hava boðað frá, at komið er á mál við teimum innanríkiskrøvum, sum neyðug eru fyri at seta sáttmálan í gildi. 

Og løgtingið skal góðkenna hann.

Avgerðin um at undirrita sáttmálan var ikki mett at vera ein avgerð av stórum uttanríkispolitiskum týdningi, sum Uttanlandsnevndin skal viðgera.