Enn ein føroyskur landsliðsspælari raktur av hondbóltshúsagangi

Enn ein føroyskur landsliðsspælari í hondbólti verður nú raktur av donskum hondbóltshúsagangi. 

Randers HK, har føroyski strikuspælarin, Pernille Brandenborg, spælir, fer í næstum at biðja um at sleppa í sjálvbodna likvidatión, skrivar TV2 Sport.

Hetta hevur niðurflyting úr bestu deildini í triðbestu deildina við sær.

 - Vit mugu viðganga, at vit ikki hava megna at fáa fíggjarliga stuðulin, sum krevst fyri at reka eitt yrkishondbóltsfelag, sigur formaðurin í Randers HK, Henrik Schaar við TV2 Sport.

Pernille Brandenborg og liðfelagarnir í Rander HK hava spælt átta dystir í landskappingini í ár og liggja nummar 12 av 14 liðum í bestu deildini. 

Danska hondbóltssambandið sigur sambært TV2 Sport, at úrslitini hjá liðnum verða strikað.