Havstovan mælir til hjáveiðureglur fyri at verja toskin

Havstovan mælir til, at ávísir karmar verða settir fyri at fiska hýsu og upsa undir Føroyum, so tað slepst undan, at ov nógvur toskur er uppi í veiðini.

Hetta kann gerast við hjáveiðureglum ella økisfriðingum fyri annaðhvørt ávísan reiðskap ella skipabólkar.

ICES sigur, at støðan hjá toskastovninum undir Føroyum er so vánalig, at mælt verður frá at fiska tosk á landgrunninum yvirhøvur í 2023 og 2024. 

Havstovan sigur, at hetta hevur avbjóðingar við sær, tí toskur verður fiskaður í línufiskiskapi eftir hýsu og trolfiskiskapi eftir upsa.

Havstovan hevur latið Fiskimálaráðnum tiltmæli um fiskiskap eftir botnfiski í 2023.

Havstovan

Bólkur 2 fleiri dagar

Havstovan mælir til, at fiskidagarnir hjá lemma- og partrolarum í bólki 2 verða øktir fimm prosent, og samstundis skulu fiskidagarnar í bólki 3-5 - tað eru lína, snella og trol á landleiðini - verða skerdir fimm prosent. Tilmæli tekur støði í umsitingarætlanini frá 2019.

Havstovan mælir eisini til, at fiskidagatalið á Føroyabanka verður 200 dagar næsta ár, bæði hjá stórum og smáum fiskiførum, sum fiska við húki. 

Í 2020-21 var meira at fáa av toski í yvirlitstrolingunum á Føroyabanka, og tað bendi á, at toskastovnurin var í ferð við at koma fyri seg aftur, eftir at hava verið undir minstamarki í 15 ár.

Føroyabanki tolir lítla roynd, og Havstovan mælir til, at farið verður varisliga fram.

Tilmælið frá Havstovuni sæst her.