Dukka av turkiska forsetanum við høvdinum niðureftir

Turkaland hevur sent boð eftir svenska sendiharranum, eftir eitt mótmælistiltak í svenska høvuðsstaðnum Stokkhólmi, har ein dukka, sum skuldi ímynda at vera turkiski forsetin, Recep Tayyip Erdogan, var hongd upp við høvdinum niðureftir.

Tað skrivar Reuters.

Svøríki hevur saman við Finnlandi søkt um limaskap í verjusamgonguni Nato. Øll limalondini, tó ikki Turkaland og Ungarn, hava góðkent umsóknina.

Turkaland hevur sett Svøríki krøv, sum skulu lúkast, áðrenn umsóknin um Natolimaskap verður góðkend. 

Kurdar og turkar í útlegd

Millum annað krevur Turkaland, at Svøríki skal fara harðari fram móti kurdum og turkum í útlegd, sum Turkaland heldur hótta landsins trygd.

Sonevndi Rojava-bólkurin hongdi dukkuna upp uttan fyri ráðhúsið í Stokkhólmi í gjáramorgunin.

Rojava er eitt annað navn fyri sýriska Kurdistan.

Turkaland hevur samstundis avlýst vitjanina hjá formanninum í svenska ríkisdegnum, Andreas Norlén, sum skuldi verða í næstu viku. 

Orsøkin er dukkan, sum skuldi ímynda turkiska forsetan Erdogan, sum varð hongd upp við høvdinum niðureftir.