Danski herurin raðfestir KT-trygd í Føroyum

"Hevur tú hug at arbeiða við ráðgeving innan KT-trygd til myndugleikar og fyritøkur í Grønlandi og í Føroyum, í samband við skerpaðu trygdarpolitisku støðuna í Arktis?" 

Soleiðis ljóðar brot úr eini starvslýsing hjá Forsvarets Efterretningstjeneste, ið er fregnartænastan hjá danska herinum. 

"Tað eru ikki ítøkiligar hendingar, ið hava fingið okkum at seta hetta starvið á stovn", sigur fregnartænastan í skrivligari viðmerking til Kringvarpið. "Starvslýsingin sprettir burtur úr einari politiskari avtalu frá 2021 um at styrkja KT-verjuna í Ríkisfelagsskapinum."  

"Hóttanin móti Danmark á netinum er álvarsom og áhaldandi. Tí hevur Center for Cybersikkerhed regluligt samskifti við grønlendskar og føroyskar myndugleikar um KT-trygd", sigur fregnartænastan.