Guðrið Poulsen fekk Heiðursgávu landsins 2022

Heiðursgáva landsins 2022 var fyri løtu síðani latin Guðrið Poulsen, keramikara, fyri hennara ótroyttiliga virksemið, har handverk og list ganga upp í eina hægri eind. 

Guðrið Poulsen

Heiðursgáva landsins verður latin fyri at hava virkað til frama fyri mentanarlig virði, sum hava týdning fyri føroyska mentan, list og mentanararv.

Heiðursgáva landsins er á 75.000 kr.

Tað var ein rørd Guðrið Poulsen, ið takkaði fyri heiðurin. 

Guðrið Poulsen

Í grundgevingini fyri at lata Guðrið Poulsen Heiðursgávu landsins stendur millum annað: 

"Guðrið Poulsen er slóðbrótari innan leirlist í einum landi, har onki brúkiligt leir finst.

Støðugt bjóðar listakvinnan sær sjálvari og okkum av í leitanini eftir rúmligum abstraktiónum yvir náttúruna, menniskjað og tilverunnar ævigu spurningar. 

Hon hevur verið virkin á lista- og mentanarpallinum í mong ár, og hennara fjølbroytta virksemi fevnir eisini um skeið og undirvísing, so bæði leik og lærd hava fingið ágóðan av stóru vitanini og kunnleikanum hjá henni."

Guðrið Poulsen, vasar