Russland: Ukraina visti um flogfarið við krígsfangum

Ukraina visti um russiska hernaðarflogfarið, har 65 ukrainskir krígsfangar skulu hava verið við

Andrej Kartapolov, formaður í russisku trygdarnevndini, sigur í dag, at ukrainska fregnartænastan var varskógvað um, at ukrainskir krígsfangar vóru við russiska hernaðarflogfarinum, sum datt niður í gjár, skrivar Reuters.

Russland hevur sagt, at tað var eitt ukrainskt álop, sum fekk flogfarið at detta niður, og øll, sum vóru við, lótu lív.

Málið verður kannað

Ukraina hevur hvørki váttað ella avsannað hetta, men boðar í dag frá, at hendingin verður kannað, skrivar Reuters.

Sambært Kartapolov, skal ukrainska fregnartænastan hava fingið boðini um flutningin 15 minuttir, áðrenn flogfarið kom í økið í Belgorod, har tað varð skotið niður.

Kartapolov sigur, at Russland og Ukraina eiga at halda fram við at býta um krígsfangar, skrivar Reuters.