Vil ikki hava Rumenia, Slovakia ella Hvítarussland

Varaliðskiparin á føroyska fótbóltslandsliðnum, Viljormur Davidsen, vil fegin sleppa undan at spæla ímóti Rumenia, Slovakia og Hvítarusslandi í Nations League í ár.

Hinvegin ynskir hann sær Svøríki, Kýpros, Litava ella Gibraltar undan lutakastinum, sum verður seinnapartin klokkan 17:00.

Føroyar eru í 2. styrkisbólki í C-deildini saman við Aserbadjan, Kosovo og Bulgaria. Í ovasta styrkisbólki eru Rumenia, Svøríki, Armenia og Luksemborg, Norðurmakedónia, Slovakia, Norðurírland og Kýpros eru í 3. bólki, og niðast eru Hvítarussland, Litava ella Gibraltar, Estland og Lettland.

Føroyar koma í bólk við einum av londunum í fyrsta, triðja og fjórða styrkisbólki.

 - Næstan líka mikið hvønn vit koma í bólk saman við, verður talan um sterka mótstøðu. Men tá tað er sagt, kunnu vit eisini bíta frá okkum, og tað ætla vit okkum sjálvandi at gera, sigur Viljormur Davidsen við heimasíðuna hjá FSF.

Dystirnir í UEFA Nations League 2024/2025 verða spældir í tíðarskeiðunum 5. til 10. september, 10. til 15. oktober, og 14. til 19. november í ár.