Russland gevst at rinda til Arktiska ráðið

Russland gevst fyribils at rinda árliga gjaldið til at fíggja Arktiska ráðið, til ráðið fer undir aftur 'veruligt arbeiði' saman við øllum limunum.

Tað sigur uttanríkisráðið í Russlandi við tíðindastovuna, RIA.

Talan er m.a. um náttúruvernd í Arktis, gransking og samstarv í humaniterum spurningum, serliga spurningar um upprunafólk í Arktis. 

Russiska stjórnin útihýsir ikki møguleikanum fyri heilt at taka seg úr ráðnum, men tað verður ikki nú.

Kríggið hevur broytt viðurskiftini

Viðurskiftini millum onnur lond í Arktiska ráðnum og Russland broyttust, eftir at Russland fór í kríggj við Ukraina tíðliga í 2022, tá ið Russland hevði formansskapin í ráðnum.

Limalondini í ráðnum sendu í mars 2022 út fráboðan, har tey fordømdu russisku innrásina.

Umframt Russland, eru USA, Kanada, Ísland, Danmark, Svøríki, Finnland og Noreg limir í Arktiska ráðnum.

Noreg hevur formansskapin í Arktiska ráðnum til 2025.