Trump hevur vunnið uppstillingarvalið í 13 statum

Donald Trump er stóri vinnarin á "Super Tuesday".

Tað vísa fyribils úrslitini.

Trump hevur vunnið sannførandi, og sambært AP-tíðindastovuni bendir alt á, at hann hevur vunnið í 13 statum á republikanska uppstillingarvalinum.

Statirnir eru Virginia, Tennessee, North Carolina, Oklahoma, Maine, Massachusetts, Alabama, Texas, Arkansas, Kolorado, Minnesota, Kalifornia og Alaska.

Higartil hevur hitt republikanska valevnið, Nikki Haley, bara vunnið í Vermont á amerikonsku eysturstrondini.

Valúrslitið í Utah er ikki greitt enn. 

Uppstillingarval í USA

(Mynd: Reuters/Ritzau Scanpix)

Trump: Ótrúligur dagur

Um trý tíðina í nátt føroyska tíð fagnaði Donald Trump valúrslitinum saman við sínum veljarum í borgini hjá sær í Mar-a-Lago í Florida. 

- Tað er ein orsøk til, at tey kalla dagin "Super Tuesday". Tað er sagt fyri mær, at ongantíð hevur verið ein dagur sum hesin, ein so avgerandi. Eitt ótrúligt kvøld og ein ótrúligur dagur, segði Donald Trump millum annað á røðarapallinum.

Eisini bendir alt á, at Joe Biden, forseti, hevur vunnið demokratiska uppstillingarvalið í øllum statunum, har val hava verið

Amerikanska forsetavalið er 5. november.