Leiðarin í senatinum finst hvassliga at Ísrael

Formaðurin fyri meirilutanum í amerikanska senatinum, Chuck Schumer, finst hvassliga at ísraelska forsætisráðharranum, Benjamin Netanyahu.

Hann segði í eini røðu í senatinum í gjár, at tað er skeivt at geva Ísrael alla skyldina fyri alt, sum hendir í Gasa, men  Ísrael noyðist at gera týðandi broytingar fyri at fáa varandi frið í økinum.

Hann mælti til vápnahvíld í Gasa alt fyri eitt og segði, at tað er álvarsligt mistak at vraka uppskotið um eina tveylandaloysn.

Schumer mælti eisini til nýval í Ísrael. 

Schumer segði, at Hamas, víðgongd á høgravonginum í ísraelsku stjórnini og í ísraelska samfelagnum, Benjamin Netanyahu, forsætisráðharri, og palestinski forsetin, Mahmoud Abbas, eru 'stóra forðingin fyri friði'.

- Vinna vit ikki á hesum, verða Ísrael og Vestari áarbakki og Gasa bundin í somu ógvusligu støðu, sum tey hava livað í seinastu 75 árini, segði hann.