Anna Falkenberg: Stuðli altíð stjórn, har Vinstriflokkurin er við

- Eg fari altíð at stuðla einari stjórn, sum Vinstriflokkurin er partur av, og støðan er ikki broytt, eftir at norðuratlantisku umboðini nú tryggja donsku stjórnini meirilutan.

Tað sigur Anna Falkenberg, fólkatingskvinna.

Eftir at danska stjórnin í vikuni misti meirilutan, hevur Metta Frederiksen, forsætisráðharri, boðið føroysku og grønlendsku fólkatingslimunum á fund.

Mads Fuglede

Mads Fuglede er farin úr Vinstra upp í Danmarksdemokratarnar. (Mynd: Ritzau Scanpix)

Stjórnin hevur mist innanríkispolitiska meirilutan í fólkatinginum, tí Mads Fuglede, fólkatingsmaður, er farin úr Vinstraflokkinum upp í Danmarksdemokratarnar, sum eru í andstøðu.

At forsætisráðharrin býður til kaffifundar, er einki nýtt, sigur Anna Falkenberg.

Hoyr innslag í útvarpstíðindunum: 

Sjúrður Skaale

Sjúrður Skaale, fólkatingsmaður fyri Javnaðarflokkin. 

Støðan ikki broytt

Sjúrður Skaale, fólkatingslimur fyri Javnaðarflokkin, metir heldur ikki, at støðan er broytt stórvegis:

- Sum eg havi sagt alla tíðina, vil eg helst halda meg uttan fyri mál, sum eru reint innanríkispolitisk donsk, sigur Sjúrður Skaale.

- Hinvegin hevur henda stjórnin, mær vitandi, ongantíð enn fingið nakað mál samtykt, einans grundað á egnan meiriluta, men hevur altíð havt aðrar flokkar við. Tí síggi eg ikki ta stóru broytingina, sigur Sjúrður Skaale, sum ætlar sær á fund við Mettu Frederiksen 22. mai.