Forsætisráðharrin í Slovakia skotin og fluttur á sjúkrahús

Forsætisráðharrin í Slovakia, Robert Fico, er skotin og er fluttur á sjúkrahús. 

Tað skriva fleiri altjóða og slovakiskir miðlar.

Ein journalistur á slovakiska blaðnum Dennik skrivar, at hann hoyrdi fleiri skot, og sá trygdarfólk lyfta forsætisráðharran og bera hann inn í ein bil.

Løgreglan hevur handtikið ein mann, sum hildið verður framdi álopið.

Robert Fico

Trygdarfólk fingu forsætisráðharran inn í ein bil, eftir at hann var skotin og særdur. (Mynd: Reuters/Ritzau Scanpix)

Var staddur á bygd

Fico var skotin, meðan hann hitti fólk í bygdini Handlova í Slovakia.

Robert Fico hevur í fleiri umførum verið forsætisráðharri í Slovakia, frá 2006 til 2010, frá 2012 til 2018, og hann fór undir nýtt forsætisráðharraskeið í fjør.

Fico er útbúgvin løgfrøðingur. Hann stovnaði sosialdemokratiska flokkin Smer í 1999, og hann umboðar flokkin í dag.

Í Slovakia stendur forsætisráðharrin á odda fyri stjórnini, har meginparturin av útinnandi valdinum í landinum liggur. 

Forsetin tilnevnir forsætisráðharran.