Parlamentsval í Bretlandi 4. juli

Bretar skulu á val, longu 4. juli.

Tað boðaði bretski forsætisráðharrin, Rishi Sunak, frá í gjár.

Parlamentsval skal haldast í Bretlandi fyri 28. januar næsta ár. Men so leingi ætlar Sunak sær ikki at bíða.

Tá hann skrivaði út val í gjár, vísti forsætisráðharrin á, at búskaparliga gongdin í Bretlandi er vend - nú er aftur framgongd og vøkstur at hóma, inflatiónin er komin niður á tvey prosent - og bretar skulu longu í summar fáa møguleikan at gera av, hvør skal leiða landið víðari, sigur hann.

Stendur seg illa

Konservativi flokkurin hjá Rishi Sunak hevur annars staðið seg sera illa í meiningskanningunum. Í marsmánaði stóð so illa til, at flokkurin hevði ikki fingið meira enn 98 av teimum 650 sessunum í bretska undirhúsinum, hevði val verið tá.

Men Rishi Sunak sigur, at hann nú fer at brúka næstu tíðina til at sannføra bretska fólkið um, at konservativi flokkurin eigur at halda fram at stjórna landinum. 

Nýggjastu veljarakanningarnar geva konservativa flokkinum umleið 23 prosent av atkvøðunum, meðan andstøðuflokkurin Labour við Keir Starmer á odda fær um 44 prosent.

Bretar vóru seinast á vali 12. desember í 2019, tá Boris Johnsen vann valið fyri tey konservativu. Hann noyddist tó frá. Liz Truss tók við sum forsætisráðharri, men bara í 49 dagar, áðrenn Sunak gjørdist stjórnarleiðari.