Føroyar gjørt avtalu við Bretland og Noreg um makrel

Føroyar, Noreg og Bretland hava seinnapartin skrivað undir strandarlandaavtalu um makrel.

Føroyska kvotan verður 12 prosent av heildarkvotuni, sum ICES hevur mælt til, ella umleið 90.000 tons. 

Dennis Holm

Dennis Holm, landsstýrismaður í fiskivinnumálum. 

Avtalan ber eisini í sær, at føroysk skip sleppa at fiska makrel í norskum og bretskum sjógvi. 

Avtalan er galdandi í trý ár.

Sambært semjuni verður føroyski parturin 12 prosent av mest loyvdu veiðu. Harumframt fáa Føroyar rætt at fiska 35 prosent av sínum kvotaparti í bretskum sjógvi og 40 prosent í norskum sjógvi. 

Samanborið við makrelsemjuna frá 2014, minkar føroyski parturin úr 12,6 prosentum niður í 12 prosent av mest loyvdu veiðu.

Hinvegin verða størri møguleikar at fiska í norskum og bretskum sjógvi.

Dennis Holm, landsstýrismaður, sigur, at hóast føroyski parturin av mest loyvdu veiðu minkar, hevur henda semjan umleið sama virði sum makrelsemjan í 2014.

Semjan, sum er á enskum, kann lesast her:

Hoyr samrøðu, sum Jón Brian Hvidtfeldt gjørdi við Dennis Holm, landsstýrismann í fiskivinnumálum, í útvarpstíðindunum klokkan 15: