Flogskipararnir hava tað gott

Lítla flogfarið var á veg úr Kanada til Narsarsuaq, tá tað um middagsleitið í gjár, grønlendska tíð, sendi út neyðarkall.

Danska verjuskipið Triton var har á leiðini, og skjóttgangandi bjargingarbáturin hjá skipinum var hjá flogfarinum, bara hálvan tíma eftir at neyðarkallið var móttikið.

Flogfarið fleyt tá framvegis í sjónum, og menninir vóru farnir í lítla bjargingarbátin hjá flogfarinum. 

Arktisk kommando hevur almanna kunngjørt myndir av hendingini. 

Tveir flogskiparar vóru teir einastu umborð á flogfarinum. Læknin umborð á Triton kannaði teir, og kundi síðani staðfesta, at báðir menninir høvdu tað gott.

Flogskipararnir eru úr Týsklandi, har flogfarið eisini er skrásett.

Danska skaðanevndin kannar nú orsøkina til, at flogfarið datt niður.