Fýra mánaðir treytaleysa fongsulrevsing fyri at sláa Mette Frederiksen

39 ára gamli póllendingurin, sum sló danska forsætisráðharran, Mette Frederiksen, í juni, varð í dag dømdur fýra mánaða treytaleysa fongsulrevsing.

Maðurin sló Mette Frederiksen við knýttari hond á høgra yvirarm, og misti forsætisráðharrin fótafetið av slagnum. 

Talan er um harðskap móti tænastumanni í arbeiði, ljóðar dómurin.

Danska stjórnin, Mette Frederiksen, Lars Løkke Rasmussen, Troels Lund Poulsen

Eisini útvístur

Í dóminum verður dentur lagdur á, at maðurin sjálvur hevur greitt frá, at hann kendi aftur forsætisráðharran.

Eisini hevur lívverjin hjá Mette Frederiksen greitt frá, at 39 ára gamli póllendingurin hevði ein aggressivan atburð, tá hann legði eftir forsætisráðharranum.

Sambært danska kringvarpinum varð póllendingurin í sama viðfangi dømdur fyri fleiri smærri lógarbrot, sum einki hava við álopið á forsætisráðharran at gera.

Umframt fýra mánaðir treytaleysa fongsulsrevsing er póllendingurin útvístur úr Danmark í seks ár.

Maðurin tók við dóminum.