Visit Faroe Islands um Klæmintsgjógv: "Eitt heimsmet er stórt fyri okkum"

Klæmintsgjógv í Hesti er heimsins størsta helli. Tað var staðfest tann 19 juli, tá ið 3D skanningar vóru gjørdar í hellinum. 

Tað er ein góð søga hjá okkum, sigur Guðrið Højgaard, stjóri í Visit Faroe Islands. 

Ferðavinnan fer heilt vist at fáa ágóðan av hesum, sigur Guðrið Højgaard, sum væntar, at nýggja heimsmetið kann fáa fleiri ferðafólk til Føroya. 

Higartil hevur eitt helli í Nýsælandi havt metið, men í juli vóru 3D-skanningar gjørdar í Hesti, og greitt var altso, at talan er um eitt nýtt heimsmet. 

Rikoriko í Nýsælandi er 221.494 rúmmetrar, men sambært skanningini er Klæmintsgjógv umleið sjey túsund rúmmetrar størri og undir vatninum er tað umleið 50.000 rúmetrar størri.

Henry Henderson-Genefaas, tekniskur serfrøðingur, gjørdi skanningina. Aftrat honum vóru Gethin Wyn Roberts, sum er dátuserfrøðingur á Umhvørvisstovuni og Anne Marie Berg Norby, sum er uppmátari á Landsverki. 

Til ber at síggja skanningina av Klæmintsgjógv her: Heimsins størsta helli er í Hesti