RFF: Ongin fyrimunur við at lækka aldursmarkið fyri koyrikort

- Tú fær meg ikki at siga, at tað er nakar fyrimunur við at lækka aldursmarkið fyri at fáa koyrikort niður í 17 ár. 

Tað sigur Lovisa Petersen Glerfoss, stjóri í Ráðnum fyri ferðslutrygd, nú løgtingskvinnan Elsebeth Mercedis Gunnleygsdóttir hevur sett Dennisi Holm, landsstýrismanni, ein fyrispurning, um hann hevur ætlanir um at lækka aldursmarkið niður í 17 ár, sum tað er í til dømis Danmark.

- Tað kann vera stórur munur á at vera 17 ár og 18 ár. Tí eiga vit at vera sera varin við at lækka aldursmarkið, sigur Lovisa Petersen Glerfoss.

Í Danmark varð lógin broytt í 2017 soleiðis, at ein kann fáa koyrikort, tá ein fyllir 17 ár. Tó fylgir tann treytin við, at inntil viðkomandi er blivin 18 ár, skal hann ella hon hava ein "fylgjara" við í bilinum.

Hesin fylgjarin skal vera í minsta lagi 30 ár og skal hava havt koyrikort í í minsta lagi 10 ár, og skal heldur ikki hava fingið koyrikortið frádømt hetta tíðarskeiðið.

Og tað eru hesar treytirnar, sum danir nú umhugsa at taka burtur.

Hoyrið samrøðu við Lovisu Petersen Glerfoss her: