Betri letur kvinnuhondbóltinum hálvatriðju millión

Betri Stuðul hevur latið Hondbóltssambandi Føroya 2,5 milliónir krónur í samband við EM-endaspælið við kvinnum, sum byrjar um góðan mánaða.

Føroysku kvinnurnar spæla í Basel ímóti Sveis, Kroatia og Danmark ávíkavist 29 november og 1. og 3. desember.

 - Tá ið kvinnurnar í vetur skulu spæla EM-endaspæl í Sveis, krevur tað nógv fíggjarliga. Fyri at tryggja hondbóltin hjá gentum og kvinnum í Føroyum letur Betri Stuðul tí Hondbóltssambandinum 2,5 milliónir kr sigur Jens Johan Dam, formaður í Betri.

 - Vit standa sjálvandi saman um hondbóltskvinnurnar, sum hava vunnið seg til EM-endaspælið. Tær eru fyrimyndir fyri okkum øll. Vilji, dirvi og felagsskapur teirra hevur gjørt, at tær nú skulu kappast um at blíva bestar í Europa. Hetta hevur stóran týdning. Ikki bara fyri føroyskan kvinnuhondbólt og Føroyar sum heild, men eisini sum íblástur fyri børn og ung, staðfestir Jens Johan Dam, formaður í Betri.

Betri stuðul letur á hvørjum ári stuðul og peningagávur, sum eru við til at fyribyrgja sjúku, fremja tryggleika – ella gagna samfelagnum í breiðari merking, skrivar 

Gunn Ellefsen, forkvinna í Hondbóltssambandinum, fegnast um gávuna og staðfestir, at hetta kemur sera væl við.

 - Tað krevur nógv fíggjarliga at vera við til slík endaspøl. Okkara kvinnur standa seg væl, og tað kostar at vera við millum tey bestu. Tí eri eg sera takksom um hesa gávuna frá Betri, staðfestir hon.