Grønlendska landsstýrið lænir tríggjar milliardir til vatnorkuverk

Landsstýrið í Grønlandi fer at læna umleið tríggjar milliardir krónur til at byggja út vatnorkuverkið í Utoqqarmiut Kangerluarsunnguat - eisini nevndur Buksefjørðurin - sum veitir streym til høvuðsstaðin Nuuk.

Tað serliga við láninum er, at pengarnir verða læntir við veðhaldi úr danska ríkiskassanum.

Ítøkiliga skal danski staturin veita trygd fyri 95 prosentum av prísinum fyri orkuverkið, sum NunaGreen Construction skal byggja.

Avtalan um lánið - við ríkisveðhaldi úr Danmark - varð undirskrivað av Nikolai Wammen, fíggjarmálaráðharra, og Erik Jensen, landsstýrismanni í fíggjar- og skattamálum, 25. oktober.

Verandi orkuverk í Kangerluarsunnguat er frá 1993, og er nú blivið ov lítið til at tryggja orkunýtsluna í Nuuk. Nýggja verkið, sum skal byggjast í tíðarskeiðnum frá 2026 til 2032, skal nøkta tørvin næstu mongu árini.