Politiskur ruðuleiki í Georgia: Mikheil Kavelashvili tekur við sum forseti

Mikheil Kavelashvili hevur verið rættiliga hvassorðaður móti vesturheiminum og serliga ES.

Hann avloysir Salome Zurabishvili, sum hinvegin hevur verið rættiliga vinarlig mótvegis ES.

Fyri fyrstu ferð er forsetin ikki valdur beinleiðis av fólkinum, men av eini nevnd av valmonnum, og síðani hevur tjóðartingið saman við lokalpolitikarum og sjálvstøðugum landslutum atkvøtt um forsetan.

53 ára gamli Mikheil Kavelashvili umboðar flokkin Dreymur Georgia, sum vann valið í oktober. Flokkurin vann valið við 54 prosentum.

Valúrslitið hevur gjørt, at tað er politiskur ruðuleiki í Georgia. Nógv mótmæli hava verið í landinum síðani 28. november.

Ein av orsøkunum er, at stjórnin ætlar at útseta samráðingarnar um limaskap í ES til 2028.

Fráfarandi forsetin Salome Zurabishvili og onnur vilja heldur ikki viðurkenna valúrslitið.

Zurabishvili sigur seg ikki vilja fara frá sum forseti og krevur nýval.

Hon boðaði í dag frá, at hon flytur úr forsetaborgini, men at hon framvegis fer at arbeiða fyri at fáa nýval. Eitt krav, sum millum annað forsetanir í Litava og Póllandi alment hava stuðlað.

Valeygleiðarar sáa eisini iva um úrslitið og ES-tingið vil heldur ikki viðurkenna valúrslitið í Georgia.