Verður írskur forsætisráðharri fyri aðru ferð

Micheál Martin verður í dag væntandi tilnevndur írskur forsætisráðharri fyri aðru ferð.

Tað hevur tikið góðar tveir mánaðir at skipa stjórn. 

Írska stjórnin er ein samgonga millum miðhøgra flokkarnar Fianna Fáil og Fine Gael. Tey hava eisini stuðul frá fleiri sjálvstøðugum umboðum.

Eftir fleiri vikur við samráðingum eru partarnir nú komnir á mál, og tjóðartingið fer seinnapartin at góðkenna Micheál Martin sum nýggjan forsætisráðharra.

Hann verður síðani formliga tilnevndur av Michael D. Higgins, forseta, áðrenn ráðharrarnir verða kunngjørdir.

Micheál Martin verður forsætisráðharri fyrstu trý árini av fimm ára valskeiðnum, meðan Fine Gael-floksformaðurin, Simon Harris, verður forsætisráðharri seinastu tvey árini. 

Andstøðuflokkurin Sinn Féin fekk 39 sessir á tjóðartinginum.