Sjálvstøðugt land í staðin fyri fullveldi ella loysing

- Eg vóni, at Føroyar vera eitt sjálvstøðugt land. 

Tað sigur Sirið Stenberg, forkvinna í Tjóðveldi, nú allir flokkar á løgtingi eru sinnaðir at gera broytingar í ríkisrættarligu støðuni.

Løgmaður nevndi í gjár eftir fund við forfólkini í øllum flokkum, at tað tykist at vera stór semja millum flokkarnar, at broytingar skulu gerast á ríkisrættarliga økinum.

Tjóðveldi hevur altíð verið ein loysingarflokkur, og Sirið Stenberg gleðist um, at hinir flokkarnir hava flutt seg á ríkisrættarliga økinum.

Hon sigur, at tað er týdningarmikið, at Føroyar vera eitt sjálvstøðugt land, men hon nýtir ikki orðið loysing ella fullveldi.

- Júst hvussu barnið eitur, er ikki tað týdningarmesta, bara vit fáa eina sjálvstøðugar Føroyar, sigur Sirið Stenberg.