- Tað, sum tú gert, skalt tú gera ordiligt

- Vit hava altíð sagt, at tað, sum vit gera, skal gerast ordiligt. Og hvørki eg ella Niclas liva ævigt, og tað at lata nakað víðari í góðum standi í góðar hendur, hevur altíð ligið okkum nær.

Tað vakti ans, tá ið tíðindini bórust, at stóra føroyska byggifyritøkan Articon verður seld av landinum. Sambært Jón Sigurdsson, stjóra í Articon, er hetta lagaliga løtan.

Saman við svágrinum Niclas Joensen, sum eisini er uppvaksin á Sandi, hevur hann bygt upp Articon upp til tað, sum hon er í dag. Ein filosofi í allar tilgongdini øll árini hevur verið at seta tey røttu fólkini.

- Vit hava altíð roynt at seta fólk, sum eru betri enn vit.

Sjálvur heldur hann seg ikki vera úrmæling á nøkrum øki, men hann dugir eitt sindur av hvørjum, og tað hevur verið hansara styrki, heldur hann. 

Ein stór fyrimynd í lívinum hjá Jón Sigurdssyni er pápin, Sigurd.

- Hann lærdi meg nógv. Bæði um tað handverksliga, men eisini um at hava dirvi, at taka avgerðir, standa við tær og standa fast, eisini tá tað gongur ímóti. Hann lærdi meg, at tað tú gert, skalt tú gera ordiligt.

Hoyra alla samrøðuna við Jón Sigurdsson, sum lýsir søguna hjá Articon, teirra filosofi og virði, um hansara bakgrund og framtíðarætlanir. Og ikki minst um tað, at selja sítt lívsverk.