USA bjóðar av í handilskríggi við Kanada og Meksiko

USA hevur bjóðað grannalondunum Kanada og Meksiko og Kina av í handilskríggi, eftir at Donald Trump mánadagin helt sítt lyfti um at seta hægri toll á vørur, sum verða innfluttar úr hesum trimum londunum.

Meksikanski forsetin, Claudia Sheinbaum, hevur sagt, at Meksiko fer at svara aftur sunnudagin, og kanadiski forsætisráðharrin, Justin Trudeau, var sera hvassorðaður, tá hann á tíðindafundi í gjár boðaði frá, at Kanada svarar aftur við eisini at seta ein 25 prosent toll á amerikanskar vørur.

Justin Trudeau

Justin Trudeau, forsætisráðharri í Kanada. (Mynd: AFP/Ritzau Scanpix)

Trump herðir handilskríggið

Í gjárkvøldið svaraði Donald Trump á sosiala miðlinum Truth Social, at USA fer at svara kanadisku tollinum aftur. Tollgjøldini vóru hækkað, tí USA í fyrstu atløgu hevði hækkað síni tollgjøld.

- Gerið so væl og greiðið Trudeau guvernøri í Kanada frá, at tá hann setur hevndartoll á USA, fer okkara tollur alt fyri eitt at hækka samsvarandi, skrivaði Donald Trump.

Hetta er ikki fyrstu ferð, at Trump kallar Justin Trudeau fyri "guvernørin í Kanada". Við hesum vísir Trump til, at hann fegin vil hava Kanada at gerast ein statur í USA - ein møguleiki, sum Justin Trudeau í gjár vísti aftur uppá tað harðasta.

Kina steðgar innflutningi av timbri og soyabønum 

Í Kina hava tey verið fyrireikað uppá, at USA fór at hækka tollmúrarnar. Kina hevur svarað aftur við at steðga innflutninginum av amerikanskum timbri  og soyabønum.

Og ES-nevndin heitir í eini felags yvirlýsing á USA um at endurskoða sína tilgongd.

- Við hesum stigum er vandi fyri at órógva altjóða handilin, skaða týðandi búskaparsamstørv og elva til óneyðugan ótryggleika í eini tíð, har altjóða samstarv er meira avgerandi enn nakrantíð, sigur ES-nevndin.