Dizzy Mizz Lizzy fer at spæla á Tórsfest

Øll tey, ið vóru ung í nítiárunum, kenna stóru hittini hjá danska rokkbólkinum Dizzy Mizz Lizzy av sjálvnevndu gjøgnumbrots- og debutplátuni. 

"Silverflame", "Love Is a Looser's Game" og "Waterline". 

Tað er ikki ov nógv sagt, at Dizzy Mizz Lizzy, við Tim Christensen á odda á sangi og gittara, legði ríkið fyri sínar føtur í 90unum.

Debutplátan er bestseljandi danska rokkplátan nakrantíð, og bólkurin eigur eisini eitt heilt serligt pláss í hjørtunum hjá mongum føroyingum. 

Bólkurin gav út útgávuna "Rotator" í 1996, sum eisini stóð seg væl. Bólkurin gjørdist eisini sera væl umtóktur í Asiu.

Men í 1998 gjørdu teir tríggir, Tim Christensen, Martin Nielsen og Søren Friis, av at fara hvør til sítt.

Silvurlogin tendraði aftur

Bólkurin var kúrrur til 2010, tá teir aftur spældu eina konsertferð saman, og tá tendraði silvurlogin aftur, kanst tú siga. Og í 2014 varð kunngjørt, at bólkurin nú aftur var virkin. 

Men tað er ikki fyrstu ferð, at Dizzy Mizzy Lizzy koma til Føroya at spæla, sum tað annars verður pástaðið í tíðindaskrivinum frá fyriskiparunum. Dizzy, sum bólkurin eitur á mannamunni, var eitt av høvuðsnøvnum á G! festivalinum í 2015. 

Afturat Dizzy Mizz Lizzy, so koma Ankerstjerne, Branco, Dave Evans, Eivør, Gavin DeGraw, Poptös, Kristina Bærendsen, Sandro Cavazza og Zak Abel at spæla á Tórsfest í ár.