Skulu fáa pensjón, áðrenn fólkapensjónsaldurin er rokkin

Eirikur í Jákupsstovu, landsstýrismaður í almanna- og mentamálum, hevur borið uppskot í løgtingið, um at tey, sum hava verið á arbeiðsmarknaðinum í 50 ár, frá 16 ára aldri, skulu hava rætt til at fara av arbeiðsmarknaðinum við eini sonevndari tíðartreytaðari pensjón frá landinum.

- Tey, sum hava arbeitt frá heilt ungum árum, skulu hava møguleika at fara av arbeiðsmarknaðinum við pensjón, áðrenn fólkapensjónsaldurin er rokkin, sigur Eirikur í Jákupsstovu.

Javnaðarflokkurin sigur í tíðindaskrivi, at uppskotið fevnir um tey, sum hava verið á arbeiðsmarknaðinum, síðani tey vóru 16-19 ára gomul, og tryggjar fólki, sum hava arbeitt í minsta lagi í hálva tíð í 50 ár tilsamans.

- Tað hevur týdning fyri okkum í Javnaðarflokkinum, at vit fáa eina serliga skipan, sum loftar teimum, ið frá ungum árum hava verið arbeiðsvirki sigur Hans Jacob Thomsen, tingmaður og limur í Trivnaðarnevdini.

Hans Jacob Thomsen, Løgtingið

Frítekst tagging: 

Hans Jacob Thomsen

løgtingið

Bjarni Árting Rubeksen

Hans Jacob Thomsen umboðar Javnaðarflokkin í Trivnaðarnevndini. (Mynd: Bjarni Árting Rubeksen)

Leggja upp fyri barnsburðarfarloyvi og arbeiðsloysi

Hann sigur seg fegnast um, at landsstýrismaðurin í samráð við meirilutan í Trivnaðarnevndini nú leggur uppskot fram um tíðartreytaða pensjón.

Í uppskotinum verður lagt upp fyri barnsburðarfarloyvi, umframt arbeiðsloysi, sjúkrafráveru og líknandi, so hesi verða íroknað virkni á arbeiðsmarknaðinum.

Løgtingið viðger í hesum døgum eitt uppskot um, at fólkapensjónsaldurin skal hækka í 2035.

Sambært nýggja uppskotinum skal skipanin við tíðartreytaðari pensjón fara at virka, samstundis sum pensjónsaldurin hækkar í 2035.

Vit frætta meira um hetta í tíðindasendini klokkan 18.