Russland vil hava sigur og ikki semju

Næstformaðurin í trygdarráðnum í Russlandi, Dmitri Medvedev, sigur, at Russland vil hava sigur, ikki semjur, í friðartingingunum við Ukraina.

- Samráðingarnar í Istanbul hava ikki verið hildnar fyri at fáa semju um frið við nyttuleysum treytum hjá øðrum, men fyri at tryggja okkum skjótan sigur og fullkomna oyðilegging av nýnazistisku stjórnini, sigur Medvedev á miðlinum Telegram.

Hann lovar samstundis, at Russland fer at svara aftur ukrainsku dronuálopunum um vikuskiftið.

- Hetta verður hevnt, sigur Medvedev.

Medvedev var forseti í Russlandi frá 2008 til 2012 og tók síðani við sum forsætisráðharri, og var tað fram til 2020.

Dmitry Peskov

Dmitri Peskov

Eingin loysn í væntu

Talsfólkið hjá Vladimir Putin, forseta, Dmitri Peskov, væntar ikki, at nøkur loysn verður funnin á krígnum í Ukraina, og einki framstig verður heldur í næstum.

Hann sigur, at tað er lítið sannlíkt, at Putin í næstum fer at hitta ukrainska forsetan, Volodymyr Zelenskyj, og amerianska forsetan, Donald Trump. 

Ukraina og Russland høvdu beinleiðis fundir á lægri stigi í Istanbul í gjár.

Zelenskyj skrivar á Telegramm í dag, at hann er ti lreiðar at taka stig fyri at enda kríggið, og heitir á Putin um at geva sendinevndini heimild til at taka slík stig.