Putin: Havi einki ímóti at hitta Zelenskyj

- Eg havi einki ímóti at hitta Zelenskyj, sigur Putin sambært russisku tíðindastovuni Interfax.

Tað sigur hann í sambandi við, at amerikanski forsetin, Donald Trump, og russiski forsetin skulu hittast í næstu viku, men tað hevur verið ivamál, um Zelenskyj eisini verður við á fundinum.

Men nú sigur Putin, at hann hevur einki ímóti at hitta ukrainska forsetan. Hann leggur tó aftrat, at ávísar treytir fylgja við.

Russiski forsetin mælir til, at fundurin verður hildin í Sameindu arabisku emiratunum.

Zelenskyj hevur ikki viðmerkt málið enn.

Høvdu fund í tríggjar tímar

Í gjár hevði serligi sendimaðurin hjá USA, Steve Witkoff, fund í tríggjar tímar við russiska forsetan, Vladimir Putin, í Kreml.

Marco Rubio, amerikanskur uttanríkisráðharri, sigur, at fyri fyrstu ferð í langa tíð er Russland komið við dømum um, hvat landið krevur fyri at enda kríggið. Hann leggur aftrat, at týdningarmestu viðurskiftini snúgva seg um landaøki.

Tað skrivar Reuters.

Hinumegin borðið sigur ukrainski forsetin, Volodymyr Zelenskyi, at tað sær út til, at trýstið á Russland virkar, tí landið eftir øllum at døma nú er meira opið fyri einari vápnahvíld.