Óli fær fyrsta dystin í Champions League

Óli Mittún fær sannan elddóp í Champions League, tá GOG vitjar katalanska stórfelagið Barcelona í kvøld.

Føroyski bakspælarin skifti úr svenskum hondbólti, til fjónska liðið í summar, og í kvøld skal hann spæla í størstu kappingini hjá EHF fyri fyrstu ferð.

 - Barcelona á útivølli er kanska ein av truplastu dystunum yvirhøvur, so vit verða royndir frá byrjan. Eg gleði meg at spæla á hesum pallinum, og vónandi kunnu vit røkka einum góðum úrsliti, sigur Óli Mittún á facebook-vanganum hjá fjónfelagnum.

GOG var ikki í Champions League í fjør. Kappingaárið 23/24 varð fjónska liðið við, men varð útsligið í playoff-umfarinum eftir bólkaspælið.

Füchse Berlin skal reisa seg 

Hákun West av Teigum og Füchse Berlin leggja fyri á útivølli ímóti franska felagnum Nantes. Felagið úr Berlin skal reisa seg eftir lemjandi 38-32 heimatapið fyri Magdeburg um vikuskiftið.

Óró hevur valdað í Füchse Berlin síðstu vikurnar. Ítróttastjórin Stefan Kretzschmar og venjarin Jaron Siwert, sum leiddi høvuðsstaðarfelagið til sítt fyrsta meistaraheitið og Champions League-finaluna í fjør, eru ikki longur í Berlin, og danski venjarin Nicolej Krickau stendur nú á odda hjá Hákuni West av Teigum og teimum. Danin varð venjari hjá GOG frá 2017 til 2023, tá hann fór til Flensburg-Handewitt. Har var hann uppsagdur í desember í fjør.