Sendimaður: - Hetta er rætta løtan at hava friðarsamráðingar

Í morgin eru tað tvey ár liðin, síðan yvirgangsálopið hjá Hamas á Ísrael, sum elvdi til núverandi kríggið í Gasageiranum.

Heimsins eygu eru í dag vend móti Miðeystri, tí í dag byrjaðu friðarsamráðingar millum Ísrael og Hamas í Sharm el-Sheikh í Egyptalandi. 

Samráðingarnar koma eftir, at Hamas hevur góðtikið partar av eini 20-parts ætlan, sum Donald Trump hevði lagt fram. 

Amerikanski forsetin, Donald Trump, hevur góðar vónir til samráðingarnar - og at vápnahvíld og leyslatan av gíslum - kemur upp á pláss longu í hesi vikuni.

- Vit hava havt fleiri góðar fundir við Hamas, og tað sær út til at virka. Nú fáa vit at síggja, hvat tað endar við, sigur Donald Trump.

Sendimaður Føroya í Ísrael, Petur Petersen, heldur, at hetta er rætta løtan at hava friðarsamráðingar millum partarnar.

Hoyr samrøðu í tíðindunum á nátturða:

Í friðarætlanini hjá Trump stendur millum annað, at:

- Um báðir partar taka undir við uppskotinum, endar kríggið beinanvegin og øll hernaðarlig átøk - eisini bumbuálop - verða steðgað.

- Ísrael fer hvørki at leggja Gasa undir seg ella hertaka tað.

- Allir gíslar, sum eru eftir - livandi og deyðir gíslar - skulu latast aftur innan 72 tímar eftir, at Ísrael hevur góðtikið friðarætlanina.

- Tá allir gíslar eru leyslatnir, fer Ísrael at sleppa 250 fangum leysum, umframt 1.700 fólk úr Gasa, sum hava verið varðhaldsfongslað eftir Hamas-álopið tann 7. oktober í 2023.

Hamas hevur játtað at lata gíslum leysum og at lata palestinskum teknokratum valdið í Gasa, men vil eisini samráðast um onnur lyklamál, so sum avvápnan og framtíðina hjá Gasa.