Stýrisformaðurin: Landsstýrið skal halda fingrarnar burturi frá ALS

Landsstýrið skal halda fingrarnar langt burturi frá Arbeiðsloysisskipanini. Tað er enntá ásett í lógini fyri ALS.

Tað sigur formaðurin í stýrinum fyri ALS, Alfred Petersen, sum fríggjadagin bað landsstýrið um at strika ALS av uppskotinum til fíggjarlógarlóg fyri næsta ár.

Á síðu 466 í fíggjarlógaruppskotinum fyri 2026 stendur ein nýggjur postur - gjald til Arbeiðsloysisskipanina.

Har eru inntøkurnar ásettar til 168 milliónir og útreiðslurnar somuleiðis til 168 milliónir.

Fíggjarlógaruppskotið varð lagt fram 30.september. Tríggjar dagar seinni, 3.oktober, varð nýtt ALS-stýri valt.

Grein-2A í ALS-lógini sigur stutt og greitt, at "inntøkur og útreiðslur grunsins verða ikki tiknar við á løgtingsfíggjarlógina".

Undranin hjá nýggja stýrisformanninum gerst bara størri av, at undanfarna stýrið segði kortanei, tá landsstýrið fyrr í ár kunnaði tað um ætlanina at fáa ALS á fíggjarlógina:

Undanfarna stýrið var samt um at siga nei.

Hesa ferð eru seks stýrislimir ímóti - sjeyndi stýrislimurin er ein ráðgevi í Fíggjarmálaráðnum, sum nú umboðar tað almenna sum arbeiðsgevara.

Hoyr innslag í útvarpstíðindunum: 

Útvarpið hevur tosað við Ruth Vang, landsstýriskvinnu í fíggjarmálum. Hon ger viðmerking til málið í tíðindunum í dag.