Sinnaður at endurskoða reglur um grundstykki

At selja grundstykki fyri minni enn tað, tey kosta at gera byggibúgvin, er beinleiðis ella óbeinleiðis stuðul uttan lógarheimild.

Tað sigur Bjarni Kárason Petersen, landsstýrismaður, í svari til Anniku Olsen, løgtingskvinnu.

Kommunala eftirlitið hartaði Tórshavnar kommunu fyri at selja grundstykki í Kollafirði bíligari enn kostprísur var.

Annika Olsen spyr, um landsstýrismaðurin og Løgmálaráðið eru sinnað at broyta tulking, tá grundstykki vera seld fyri prís, sum er ásettur eftir sakligum leiðreglum, sum taka atlit at staðbundnum viðurskiftum, sum tingkvinna sigur.

Bjarni Kárason Petersen sigur seg vera sinnaðan at endurskoða reglurnar, um tað vísir seg, at galdandi reglur innibera óneyðugar avmarkingar ella vantandi greidleika.