Vikugesturin: Smæðin og bersøgin

Tú skuldi ikki trúð tí. Kvinnan, sum hevur gjørt tað til sítt vørumerki at skriva hvøss og onkuntíð hørð ummæli av list frá hjartanum, er smæðin. Men tað er hon, og onkuntíð spælir hon sjónleik, tá ið hon er millum fólk.

Í vikuni fekk hon virðisløn M.A. Jacobsens í yrkisbókmentum fyri bókina Í eygnahædd - um samtíðarlíst í Føroyum í 20. øld. Ein bók, har hon skrivar um list í tjúgunum. Og hon viðgongur, at hetta hevur verið tann truplasta av teimum 13 bókunum, hon hevur skrivað. Hon hevur verið noydd at velja og vraka millum listafólk, og tíðin fer at vísa, um hon valdi rætt.

Vinkonan Anna Djurhuus hevur nógv áhugavert at siga um Kinnu:

- Kinna er frálík. Tað er bert ein Kinna. Hon er hjartagóð, spennandi og hevur lætt við at vísa sínar kenslur. Eitt, sum fólk ikki vita, er, at hon er smæðin.

Kinna viðgongur, at soleiðis er.

- Eg kann fara inn til eina fernisering í Listasavninum og hava hug at fara í kamuflasju, sum er líka vorðin sum listaverkini á vegginum fyri at blíva ósjónlig. Tað er virkuliga ringt. Tað vil siga, at so spælir man eitt sindur komediu. Eg hugsi eisini, at tað er ein pinkulítil sjónleikari í mær. Tað er strævið. 

Kinna Poulsen vaks upp á Lútzenstrøð í Havn. Foreldrini vóru Ester og Ásmund, sum var fotografur. Í grannalagnum búðu listafólk sum Ingálvur av Reyni og Eivind Mohr, og hesin seinni vísti henni tíðliga, hvussu ein málningur verður bygdur upp.

Alt hetta hevur helst verið ein spíri til tað, sum skuldi gerast lívsleiðin hjá Kinnu: Listin. Hon er lærari á Glasi, men hon hevur eisini undirvíst ta tíðina, tá ið studentaskúlin var í Hoydølum, har hon sjálv gekk.

Tá ið hon var blaðung, fekk hon ein leiklut sum Maria Magdalena í Jesus og Makedonarin, og sangurin hevur givið henni nógv og rík minni.

Yrkjarin Tóroddur Poulsen sigur um Kinnu, at hon langt síðan átti at fingið Emmuna:

- Men erlig ummæli skapa fíggindar, serliga í myndlistaverðini. Fólk gevast við at heilsa og síggja lívsfornermaði út. Tað kostar, men tað fær ikki Kinnu at gevast, sigur Tóroddur Poulsen.

Kinna Poulsen viðgongur, at tað kann skapa fíggindar, tá man ummælir kritiskt.

- Tað er ræðuliga óbehagiligt. Serliga tá man er væl uppdrigin. Eg eri ein væl uppdrigin genta.

Hoyr alla samrøðuna við Kinnu Poulsen, sum var Vikugestur.