USA strikar revsitiltøk móti Sýria

USA strikar revsitiltøkini móti Sýria.    

Tað er greitt, eftir at amerikanski forsetin, Donald Trump, í gjár hitti sýriska forsetan, Ahmed al-Sharaa, í Hvítu húsunum.

Sambært umsitingini hjá sýriska forsetanum tosaði Sharaa um sýrisk mál og um at styrkja sambandið við Trump, skrivar Reuters.

Uttanríkisráðharrarnir í báðum londum vóru eisini við á fundinum. Fundurin var fyri afturlatnum hurðum, og journalistar høvdu onga atgongd. 

Fyrsta vitjan síðani 1946

Hetta er fyrsta almenna vitjan hjá einum sýriskum forseta í Washington D.C., síðani Sýria fekk sjálvstýri í 1946.

Fundurin var bert fáar dagar eftir, at ST, Bretland og ES strikaðu revsitiltøkini móti Sharaa, - manninum sum var uppreistrarleiðari, men gjørdist forseti í Sýria. 

Hann varð eisini fyri stuttum strikaður av einum amerikonskum lista yvir yvirgangsfólk.