Flogfeløg gevast at flúgva til Venesuela

Fleiri flogfeløg eru givin at flúgva til Venesuela.

Tað gera tey, eftir at amerikanska flogferðslueftirlitið, FAA, hevur ávarað um økt hernaðarligt virksemi, nú USA er farið undir at senda fleiri herfólk til Karibia.

Tað skrivar norska kringvarpið.

USA hevur hernaðarflogfør og herskip í økinum í sambandi við, at politiska leiðslan í Washington hevur sett í verk átak ímóti rúsevnum. Higartil hevur USA skotið og søkt minst átta bátar, sum amerikanarar siga hava siglt við rúsevnum úr Venesuela til USA.

Fyri einari viku síðan váttaði amerikanska verjan, at flogberin, USS Gerald R. Ford, var komin í karibiska havið.

Venesuelansku myndugleikarnir hava mótmælt økta amerikanska hernaðarvirkseminum í økinum. Myndugleikarnir siga, at hetta er fyrsti partur av einari ætlan at reka Nicolas Maduro, forseta, frá valdinum í Venesuela.

USA hevur lagt Maduro undir at standa á odda fyri einum rúsevniskartelli.