Leingja lógina um mvg-frítøku fyri at byggja leigubústaðir

Tey, sum byggja ella umbyggja leigubústaðir, fáa meirvirðisgjaldið aftur.

Og tað skulu tey fáa líka til 1. januar 2031.

Lógin, sum nú er, er galdandi hetta árið út.

Men nú er Fíggjarmálaráðið komið í løgtingið við uppskoti um at leingja lógina fimm ár. Sagt verður, at landsstýrið arbeiðir við einum bústaðarpakka.

Í honum verður skipanin at endurrinda meirvirðisgjald, tá leigubústaðir vera bygdir, væntandi endurskoðað. Treytirnar eru óbroyttar.

Í minsta lagi tveir leigubústaðir

Byggjast skal fyri meira enn 200.000 kr., tá meirvirðisgjaldið ikki er talt við. Í minsta lagi tveir leigubústaðir skulu bygggjast.

10 prosent, tó minst ein bústaður, skal vera til fólk í koyristóli.

Og matrikulnummarið, har leigubústaðirnir vera bygdir ella umbygdir, skal ikki fáa rentustuðul.

Síðani 2020 eru slakar 200 mió. kr. endurgoldnar í meirvirðisgjaldi til teirra, sum byggja ella umbyggja leigubústaðir. 

Les uppskotið her.