Íslendsk lóg var ikki brotin, tá USA tók russiska tangaskipið

Tað var ikki brot á íslendska lóggávu, tá USA í gjár legði hald á eitt tangaskip undir russiskum flaggi, hóast atsóknin fór fram í íslendskum sjógvi, umleið 200 kilometrar sunnan fyri Ísland. Og USA gjørdi seg heldur ikki inn á íslendska suverenitetin.
 
Tað segði Snjólaug Árnadóttir, serfrøðingur í havrætti, við íslendska kringvarpið RÚV í gjárkvøldið.
 
- Vit kenna sjálvandi ikki allar smálutir í málinum, eitt nú hvat skipið ítøkiliga er skuldsett fyri. Men vit hava onga lóggávu, sum forðar USA í at gera tað, sum gjørt var í gjár, sigur Snjólaug Árnadóttir.
 
Sambært havrættarserfrøðinginum hevði støðan verið øðrvísi, um hendingin fór fram innan fyri 12 fjórðinga markið. 

Snjólaug Árnadóttir

Snjólaug Árnadóttir var í íslendskum sjónvarpi í gjárkvøldið. (Mynd: RÚV)

Fullveldið røkkur út á 12 fjórðingar
 
- Íslendska fullveldið og íslendsk lóggáva røkkur út á 12 fjórðingar. Men uttan fyri tað eru aðrar reglur galdandi, og har hava myndugleikarnir ikki somu heimildir, sigur Snjólaug Árnadóttir við RÚV.
 
USA hevði kunnað íslendsku myndugleikarnar um, at USA møguliga fór at fremja eina atsókn móti tangaskipinum Marinera, meðan tað var í íslendskum sjógvi. Tað váttar uttanríkismálaráðið í skrivligum boðum til RÚV. 
 
Har verður upplýst, at íslendsku myndugleikarnir løgdu dent á, at altjóða lóggáva fór at verða hildin í atsóknini. Og Ísland hevði eisini bjóðað sær at veita bjarging og aðra hjálp, skuldi tað verið neyðugt.