Nóg birgur at møta í altjóða revsidómstólinum

Fyrrverandi filipinski forsetin, Rodrigo Duterte, sum er 80 ára gamal, er nóg birgur at kunna møta í altjóða revsidómstólinum, ICC, í februar.

Tað staðfestu dómararnir í rættinum í dag. 

Advokatarnir hjá 80 ára gamla Duterte hava víst á, at hann hevur ikki nóg góða heilsu at koma í rættin.

Duterte er ákærdur fyri brotsverk móti mannaættini og fyri at hava verið við í í minsta lagi 76 drápum í sambandi við harðrenda "kríggið móti rúsevnum", meðan hann var forseti.

Myndugleikarnir viðganga, at mera enn 6.000 fólk lótu lív í atsóknum, men mannarættindastríðsbólkar halda, at veruliga talið er nógv størri.

Duterte skal møta á rættarfundi 23. februar, har dómarar taka støðu til, um uppáhaldið hjá ákæranum er nóg grundað til at fara víðari til formligan rættarfund.