Keir Starmer sýtir fyri at leggja frá sær

Bretski forsætisráðharrin, Keir Starmer, sýtir fyri at leggja frá sær sum eitt úrslit av vaksandi politisku kreppuni í samband við, at Peter Mandelson í februar í fjør var tilnevndur bretskur sendiharri í USA.

Tað skrivar Reuters-tíðindastovan.

Tveir av næstu ráðgevunum hjá Keir Starmer hava sagt seg úr starvi av gøluni.

Fyrst var tað Morgan McSweeney, sum hevur verið strategiskur ráðgevi hjá Keir Starmer í nógv ár, ið legði frá sær sum ovasti stápsstjóri. Og í dag gjørdi samskiftisstjórin hjá honum, Tim Allan, av at gera tað sama, so forsætisráðharrin kann fáa eitt nýtt lið av ráðgevum í staðin.

Keir Starmer hevði í morgun ein fund við síni starvsfólk í Downing Street, og tá harmaðist hann, at Peter Mandelseon var tilnevndur sendiharri í fjør.

Men Keir Starmer ætlar at halda fram sum forsætisráðharri, segði hann.

Labour í Skotlandi vil eisini hava Starmer frá

Trýstið á Keir Starmer hevur verið øgiligt allastaðni.

The Times veit at siga, at Anas Sarwar, leiðari í skotska Labour-flokkinum, seinni í dag fer at mæla Keir Starmer til at leggja frá sær. Labour-flokkurin í Skotlandi hevur mist nógv í seinastuni, og liggur nú aftanfyri bæði SNP og Reform UK í nýggjastu málingunum.

Memi Badenoch, andstøðuleiðari og formaður í Konservativa flokkinum, kastar Keir Starmer fyri vantandi tamarhald á stjórnini, og innanfloks stúra nógvir Labour-politikarar fyri, at hetta kann gerast til eina kreppu, sum flokkurin missir tamarhaldið á.