Frítekst tagging:
- Tíðindi, mentan og ítróttur
'Kiko' Costa basti Óla
'Kiko' Costa basti Óla
Portugisin Francisco 'Kiko' Costa er valdur til heimsins besta unga hondbóltsspælara frammanfyri Óla Mittún, sum kortini vann atkvøðugreiðsluna hjá hondbóltsfjepparum
Francisco Costa telist millum lyklaspælararnar hjá Portugal, sum hevur tikið seg nógv fram síðstu árini
Mynd: Ritzau/Scanpix
13.02.2026 - 13:17
Tað eydnaðist ikki Óla Mittún at gerast heimsins besti ungi hondbóltsleikari hjá altjóða hondbóltssamgonguni IHF.
Portugisin Francisco 'Kiko' Costa úr Sporting endaði á fyrsta plássi frammanfyri føroyingin og svian Nikola Roganović.
Francisco Costa fekk stóra undirtøku millum venjarar og nevndini hjá IHF fyri venjing og venjingarháttir, CCM, sum samanlagt taldi tveir triðingar í samanteljingini.
Óli Mittún vann atkvøðugreiðsluna fyri hondbóltsfjeppararnar. Í 2023 vann Elias Ellefsen á Skipagøtu heiðurin sum heimsins besti ungi spælari í kapping við Juri Knorr og Nils Lichtlein úr Týsklandi.
Óli Mittún spældi eitt flott EM-endaspæl, og Í U21-HM í fjør var hann framúr, men tað rakk ikki til heiðurin sum heimsins besti ungi spælari. (Mynd: Ritzau/Scanpix)
Gidsel hattrikk
Tað kemur neyvan óvart á nakrar, at Mathias Gidsel fór avstað við heitinum sum heimsins besti hondbóltsspælari triðja árið á rað.
Liðfelagin hjá Hákuni West av Teigum í Fücshe Berlin var stórfavorittur og vann frammanfyri danska málverjan Emil Nielsen og kroatan Ivan Martinović.
Norska Henny Reistad var kosin heimsins besta hjá kvinnunum, meðan Viola Leuchter fekk heiti sum heimsins besti ungi spælari.
Er kopiera
Nýggjastu sendingar í ÚV
Nýggjastu sendingar í SV
