Andstøðuleiðarin í Ungarn lovar at geva fólkinum frælsi aftur

Andstøðuleiðarin í Ungarn, Peter Magyar, lovar at gera enda á korruptiónini í landinum, endurreisa búskapin og annars geva ungarska fólkinum sítt frælsi aftur.

Lyftini gav Magyar á veljarafundi í Budapest í gjár, dagin eftir at Viktor Orban í síni árligu røðu til tjóðina skírdi flokkin hjá Magyar at vera stýrdan av Týsklandi og ES. 

Liberali høgraflokkurin hjá Magyar, Tisza, hevur í fleiri vikur fingið størstu undirtøkuna í veljarakanningunum, og flestu eygleiðarar meta nú flokkin at fara at vinna tjóðartingsvalið 12.apríl.

Verður tað úrslitið, so kann Magyar gera enda á 16 ára drúgvu stjórnartíðini hjá Viktor Orban. 

Við Orban á odda hevur Ungarn ofta staðið í andsøgn við politikkin hjá ES, ikki minst tá talan er um Russland og kríggið í Ukraina.