Oljuprísirnir í Føroyum eru longu hækkaðir sjey til 10 prosent

Stríðið millum Ísrael og USA øðrumegin og Iran hinumegin hevur vart minni enn eina viku.

Men tað hevur ávirkað oljuprísirnar, og longu nú eru oljuprísirnir í Føroyum hækkaðir millum sjey og góð 10 prosent, alt eftir hvat slag av olju, ið talan er um.

Tað var leygardagin, at Ísrael og USA í felag lupu á Iran. Iran hevur hevur so svarað aftur, og hevur m.a. stongt Hormuz-sundið, sum er millum Iran og Sameindu Arabisku Emiratini.

Stongsilin hevur stóra ávirkan á oljuprísin, tí vanliga verða umleið 20 prosent av heimsins olju og gassi framleidd í Persaflógvanum, og verða so flutt gjøgnum júst Hormuz-sundið, sum nú er stongt.

Tað hevur havt við sær, at altjóða oljuprísir eru hækkaðir, og tað merkja vit eisini í Føroyum.

Thomsen oljuveiting, oljubilur

Trý oljufeløg

Vit hava trý oljufeløg í Føroyum.

Magn og Effo selja bensin og diesel til bilar, diesel til bátar og gassolju til húsarhald og vinnukundar. Thomsen selur bara gassolju.

Um vikuskiftið eru oljuprísirnir í Føroyum ikki broyttir. Men mánadagin hækkaði eitt av feløgunum sínar prísir, og í dag er fjórði dagurin á rað, at okkurt oljufelag hækkar prísirnar.

Gunnar Nielsen, Effo, 16:9

Í gjár segði Gunnar Nielsen, stjóri í Effo, við Kringvarpið, at so leingi sum stríðið í Miðeystri heldur fram, so kunnu vit vænta hægri oljuprísir í Føroyum:

Bensin kostar nú 7,6 prosent meiri,  enn áðrenn stríðið við Iran byrjaði. Diesel til bilar er dýrkað góð átta prosent. Og gassolja er dýrkað í miðal 7,9 prosent í minni enn eina viku. Í tí sambandi kunnu vit nevna, at stórur prísmunur er millum tey trý feløgini, sum selja gassolju.

Men føroyskir oljuprísir hava verið hægri  fyrr.

Í 2022, tað var eftir russisku innrásina í Ukraina, vóru prísirnir munandi hægri, enn teir eru í løtuni.