Trapputing úr Suðuroy: Kommunurnar mugu leggjast saman

Kommunurnar í Suðuroy eiga at leggjast saman til eina. Tað var tað eingin ivi um millum teir 11 suðuroyingarnar, sum vóru við í sendingini Trapputing, sum bleiv send úr Salti í Suðuroy í gjárkvøldið. 

Men ein ósemja millum bygdir - sum fer so langt aftur, at Suðuroyingar ikki sjálvir tykjast at minnast upprunan - hevur í fleiri ár forðað fyri einum breiðum samstarvi.

Tí meta fleiri suðuroyingar nú, at samanlegging av kommunum eigur at samtykjast við lóg.

Eingin semja millum politikarar

Tríggir politikarar viðmerktu sendingina Trapputing í livebloggi á kvf.fo í gjárkvøldið.

Og her vóru meiningarnar ymiskar um samanlegging av kommunum í Suðuroynni.

Sí livebloggin frá Trapputinginum í Suðuroy

Erhard Joensen fyri Sambandsflokkin, segði seg ikki vilja vera við til at tvinga nakra samanlegging ígjøgnum.

Dennis Holm úr Tjóðveldi segði seg eisini vera ímóti at leggja kommunurnar saman við lóg. 

Jóhan M. Stenberg segði seg hinvegin hava ta einfaldu meining, at kommunurnar eiga at leggjast saman. Tó sigur hann einki um, um hetta eigur at vera gjørt við lóg.